«Qinghefang» ផ្សារបុរាណដែលប្រមូលផ្ដុំនូវវប្បធម៌ចំណាស់របស់ចិន

ពីថ្ងៃទី១៧-៣០ មេសា ខ្ញុំបានទៅបំពេញបេសកកម្មនៅខេត្តចំនួន៣ នៅប្រទេសចិន គឺខេត្តក្វាងស៊ី, ខេត្តជឺជាំង និងខេត្តសានទុង។

ខេត្តទាំងបីដែលខ្ញុំបានទៅនេះ មានទេសភាពស្រស់ស្អាតណាស់។ បើនិយាយពីបរិស្ថានវិញ គឺអស់ទាស់តែម្ដង ដោយនៅតាមផ្លូវគ្មានសំរាមនោះទេ។

ឥឡូវនេះ ខ្ញុំសូមបង្ហាញទិដ្ឋភាពវិថី Qinghefang ជាវិថីនាទីក្រុងហាងចូវ ខេត្តជឺជាំង។ វិថី Qinghefang ជាទីក្រុងសម័យបុរាណ ដែលស្ថិតនៅក្រុងហាងចូវ ខេត្តជឺជាំងនេះ ជាតំបន់វប្បធម៌ និងពាណិជ្ជកម្ម មានអាយុកាលរាប់ពាន់ឆ្នាំ។ បច្ចុប្បន្ននេះ Qinghefang បានក្លាយជាផ្សារបុរាណ លក់ផលិតផលជាច្រើនប្រភេទ ដូចជាសម្លៀកបំពាក់, វត្ថុអនុស្សាវរីយ៍, ហាងតែ និងអាហារ ដែលលក់នៅតាមផ្ទះបុរាណ។ វិថីបុរាណនេះ ជាផ្នែកមួយនៃការអភិរក្សវប្បធម៌បុរាណនៅទីក្រុងហាងចូវផងដែរ។

Qinghefang បានទាក់ទាញភ្ញៀវទេសចរជាតិ-អន្តរជាតិ ឲ្យមកដើរកម្សាន្ត និងទិញទំនិញនៅផ្សារបុរាណមួយនេះ។ នៅទីតាំងផ្សារបុរាណនេះ ភ្ញៀវទេសចរខ្លះបានដើរទិញទំនិញ និងខ្លះទៀតផ្តិតរូបភាពក្នុងបរិវេណវិថី Qinghefang ដែលធ្វើឲ្យគេនឹកឃើញពីការរស់នៅរបស់ប្រជាជនចិន នាសម័យបុរាណ។ វិថី Qinghefang ដែលនៅជិតជើងភ្នំ Wu Shan នៃទីក្រុងហាងចូវនេះ បានបើកទ្វារទទួលភ្ញៀវទេសចរជារៀងរាល់ថ្ងៃ ចាប់ពីម៉ោង ៩ព្រឹកតទៅ។