ម្ភៃឆ្នាំ ក្នុងផ្នត់គំនិតថ្មី!

ថ្ងៃនេះ ជាថ្ងៃដែលខ្ញុំមានអាយុ ២០ឆ្នាំ។ ក្នុងរយៈពេល ២០ឆ្នាំ ស្មើនឹង ៧៣០០ថ្ងៃនេះ ខ្ញុំបានយល់ដឹងយ៉ាងច្រើនពីបញ្ហាជីវិត ដែលខ្ញុំបានជួបប្រទះ។ មកដល់ពេលនេះខ្ញុំសប្បាយចិត្តយ៉ាងខ្លាំង ព្រោះខ្ញុំបានស្គាល់មនុស្សល្អៗជាច្រើន នៅជុំវិញខ្លួនខ្ញុំ ដែលតែងតែជួយបង្ហាត់បង្រៀន និងផ្ដល់ឱកាស ព្រមទាំងអធ្យាស្រ័យដល់ខ្ញុំ។ តាំងពីតូច រហូតដល់បច្ចុប្បន្ននេះ ក្រៅពីក្រុមគ្រួសារខ្ញុំ ខ្ញុំមានមិត្តភក្តិល្អៗ មានបងៗ និងមានលោកគ្រូអ្នកគ្រូជាទីគោរពស្រឡាញ់ជាច្រើន ដែលចូលចិត្តខ្ញុំ។ មនុស្សគ្រប់គ្នាតែងតែឃើញខ្ញុំសប្បាយរីករាយរហូត ប៉ុន្តែខ្ញុំមិនមែនសប្បាយគ្រប់ពេលនោះទេ។ ខ្ញុំជាក្មេងស្រីម្នាក់កើតក្នុងគ្រួសារមួយ ដែលមានជីវភាពសមរម្យ ដែលមានម្ដាយជាអាជីវករម្នាក់។ ក្នុងវ័យ២០ឆ្នាំ នៅថ្ងៃនេះ ខ្ញុំបានទទួលមេរៀនជាច្រើន ទាំងការសិក្សា ការងារ និងការស្ម័គ្រចិត្តផ្សេងៗ។

ការសិក្សា

សម្រាប់ការសិក្សា ខ្ញុំជាសិស្សម្នាក់ ដែលរៀនសមរម្យ និងសាមញ្ញម្នាក់។ ពីថ្នាក់ទី១ រហូតដល់ថ្នាក់ទី១២ ខ្ញុំតែងតែទទួលចំណាត់ថ្នាក់ក្រោមលេខ១០។ ពេលខ្ញុំនៅរៀន ខ្ញុំតែងតែចង់បានចំណាត់ថ្នាក់តិចៗ ព្រោះបើខ្ញុំជាប់លេខច្រើន ខ្ញុំខ្មាសគេ។ ម៉្យាងទៀត កាលនៅរៀនវិទ្យាល័យ ខ្ញុំចូលចិត្តធ្វើជាប្រធានថ្នាក់គេផងដែរ។ ពេលនៅក្មេង ខ្ញុំដឹងថាខ្ញុំត្រូវរៀនអ្វី ព្រោះក្ដីស្រមៃតាំងពីកុមារភាពរបស់ខ្ញុំ ខ្ញុំចង់ក្លាយជា «អ្នកសារព័ត៌មានដ៏ល្បីម្នាក់»។ រហូតចប់វិទ្យាល័យ ខ្ញុំបានចូលរៀននៅសាកលវិទ្យាល័យ។ ការសិក្សាខ្ញុំ នៅសាកលវិទ្យាល័យវិញ គឺសមរម្យដូចគ្នា មិនពូកែពេក ជាសិស្សសាមញ្ញម្នាក់ដដែល។

ការងារ